Wol mich iemer wol·
der wnneklichen zit·
swenne ich si sehen sol·
dú mir ze herzen lit·
ir minneblike·
sint die strike·
die mich vahent ane strit·
ir schoͤne ist froͤiden zil·
si git swem si wil·
froͤde vnd eren vil·
Wibes lon ist wert·
nach sender arebeit·
swer sin ze rehte gert·
dem ist er vil bereit·
hohgemvͤte·
git ir gvͤte·
trost fúr sendv́ leit·
Ir schoͤne ist froͤiden zil·
si git swem si wil·
froͤde vnd eren vil·
IR reiner lip ist gv̊t·
des wen ich selbe wol·
wan er so rehte tv̊t·
dc ich des iehen sol·
si verkere·
mir die sere·
die ich von ir schulden dol·
Ir schoͤne ist froͤiden zil·
si git swem si wil·
froͤde vnd eren vil·