Winter dv wilt aber twingen·
blv̊men vf der heide wit·
gel rot durh die gruͤne vf dringe·
schowent was da rifen lit·
da man húre vf dem plan·
in des suͤssen meien tǒwe sach die liehten rosen stan·
Wol dan in die stuben tanzen·
wergant lútfrit pilgerin·
wat vnd vorhtliep einmv̊t swanzen·
ilsvng fruther perewin·
engelmar sol niht verdagen·
frideliep gvmpreht eimbich gosbreht· dc die vier den megden sagen·
Die schaffen dc man schon begiesse
in der stuben vber al·
dc die ivngen niht verdriesse·
dc dem meier ist der schal·
da hoͤret man den govenanz·
chv́nzel heinzel lat da schowen dc mit zúhten ge der tanz·
Gerdrut chvnze gepe vnd gisel·
lúte dú si ǒch gebetten·
hetze metze berht vn prisel·
heilwig dú sol helfen treite·
fridrvn dú si ǒch gemeit·
dú sage ilsmv̊t wilwirt truten· dc die drie ouch sin bereit·