Winter dv wilt aber twingē·
blv̊mē vf der heide wit·
gel rot durh die gruͤne vf dꝛinge·
ſchowēt was da rifē lit·
da man húre vf dem plan·
in deſ ſuͤſſen meien tǒwe ſach die liehtē roſen ſtan·
Wol dan in die ſtubē tanzen·
w̾gant lútfrit pilgerin·
wat vn̄ voꝛhtliep einmv̊t ſwanzen·
ilſvng fruther perewin·
engelmar ſol niht v̾dagen·
frideliep gvmpꝛeht eimbich goſbꝛeht· dc die vier den megdē ſagē·
Die ſchaffen dc man ſchon begieſſe
in der ſtuben vber al·
dc die ivngen niht v̾dꝛieſſe·
dc dem meier iſt der ſchal·
da hoͤꝛet man den govenanz·
chv́nzel heinzel lat da ſchowē dc mit zúhtē ge der tanz·
Gerdꝛut chvnze gepe vn̄ giſel·
lúte dú ſi ǒch gebetten·
hetze metze berht vn ṕſel·
heilwig dú ſol helfen treite·
fridꝛvn dú ſi ǒch gemeit·
dú ſage ilſmv̊t wilwirt truten· dc die dꝛie ouch ſin bereit·