Wol mich der ſinne

Wol mich der ſinne·
die mir ie gerietē die lere·
dc ich ſi mīne·
ie langer vn̄ ie mere·
das ich ir ere
reht als ein wunder
beſvnder
ſo ſere·
mīne vn̄ meine·
ſi reine·
ſi ſelig ſi here·

Min hende ich valde·
mit trúwē al gernde vf ir fuͤſſe·
daſſe als ýſalde·
triſtrāden mich troͤſtē mvͤſſe·
vn̄ alſo gruͤſſe·
dc ſi gebere·
min ſwere·
mir buͤſſe·
vn̄ ſi mih ſcheide·
vō leide·
ſi liebú ſi ſvͤſſe·