Wol her danket allen gůten wiben·
dc ir guͤte ist also rehte gůt·
dc zer welte nieman kan beliben·
selig vro noch rehte wol gemv̊t·
an ir trost der es alles kan·
froͤide bringen vnd vnfroͤide scheiden dan·
des froͤit ivch ir werde gernde man·
Swer nach gv̊tes wibes hulden ringet·
dem kan selten iemer missegan·
hîe was im sin dienst selden bringet·
wie froͤilichen endet sich sin wan·
ǒgen wunne herzen spil·
swes ein herze erdenken vnd erwúnschen wil·
des hat gv̊ter wibe gvͤte vil·
Das lop ist der gv̊ten wibe alleine·
da ist der valschen kleine mit gedaht·
den sol sin min lob vil vngemeine·
dar zů hat mich ein vil valsche braht·
dú ist wibes eren gram·
mich mv̊s an ir iemer rúwen wibes nam·
sit si von ir scheidet wibes scham·
Ich het mich vnselden vnderwunden·
do ich mich der valschen vnderwant·
ich was ir mit trúwen vil gebunden·
da bi wc si leidig ane bant·
ir vnstete hat die kraft·
vnd an ir behabt da her die meisterschaft·
dc si nie gebant der trúwen haft·
Als aberellen weter vert ir wille·
dc nie windes brvt als swinde en wart·
vnderwilen svͤsse in senfter stille·
schiere wider an ir irrevart·
dar nach schinet meien schin·
al zehant so wil es aber winder sin·
also wittert mir dú froͤwe min·