Wol her alle helfent singen·
wibes lop dc ich ie gerne sanc·
tůt ir dc ú mag gelingen·
swie mir noch nie wol an in gelanc·
doch gelǒbent dc ir twingen·
biderben man vf hohen mv̊t ie twanc·
Man sol frowen wol gedenken·
swer das tůt dc ist ein gv̊t gedanc·
vnd in dienen svnder wenken·
des wirt wol gelonet svnder wanc·
nieman sols mit worten krenken·
wan ir lop kan niemer werden kranc·
Man siht mich in hohem mv̊te·
dur ein wip bin ich vil hohgemv̊t·
dú vil reine svͤsse gv̊te·
ist envollen schoͤn vnd darzv̊ gůt·
ir gv̊t wiplich eren hvͤte·
hat ir lip vor wandel wol behůt·
Wol ir klein vel rotem mvnde·
iemer selig si ir svͤsser mvnt·
solde ich den in kurzer stvnde·
kússen hundert tvsent stunt·
swanne ichs in dem willen funde·
dc wer miner hohen froͤiden funt·
Tvgende han ich an ir funden·
me danne ich ir ie an wibe vant·
da von bin ich ir gebunden·
minne mich ir mit der stete bant·
des ist truren mir verswunden·
von ir grosser gvͤte mir dc swant·