Wol her alle helfent ſingē·
wibes lop dc ich ie g̾ne ſanc·
tůt ir dc ú mag gelingē·
ſwie mir noch nie wol an in gelanc·
doch gelǒbent dc ir twingen·
biderbē man vf hohen mv̊t ie twanc·
Man ſol frowē wol gedenkē·
ſwer das tůt dc iſt ein gv̊t gedanc·
vn̄ in dienen ſvnder wenken·
des wirt wol gelonet ſvnder wanc·
nieman ſols mit woꝛtē krenken·
wan ir lop kan niemer w̾den kranc·
Man ſiht mich ī hohē mv̊te·
dur ein wip bin ich vil hohgemv̊t·
dú vil reine ſvͤſſe gv̊te·
iſt envollē ſchoͤn vn̄ darzv̊ gůt·
ir gv̊t wiplich eren hvͤte·
hat ir lip voꝛ wādel wol behůt·
Wol ir klein vel rotē mvnde·
iem̾ ſelig ſi ir ſvͤſſer mvnt·
ſolde ich den in kurzer ſtvnde·
kúſſen hundert tvſent ſtūt·
ſwāne ichs in dem willē funde·
dc wer miner hohē froͤidē funt·
Tvgende han ich an ir fundē·
me dāne ich ir ie an wibe vant·
da vō bin ich ir gebundē·
mīne mich ir mit d̾ ſtete bant·
des iſt trurē mir v̾ſwundē·
vō ir groſſer gvͤte mir dc ſwant·