Wol dir svmer diner svͤssen·
wunneklichen schonen zit·
dv kanst truren wol gebuͤssen·
din kvnft hohgemvͤte git·
dv bist svͤsse·
da von ich dich svͤsse gruͤsse·
Heide velt walt· anger ǒwe·
sach ich nie bekleidet bas·
von dem lvftesvͤssem tǒwe·
sint die blv̊men alle nas·
vogeline
singent lop des meýen schine·
So singe ich von gv̊ten wiben·
als ich aller beste kan·
mit ir lop wil ich vertriben·
swc ich vngemvͤtes han·
wibes gvͤte·
git mir froͤidenrich gemvͤte·
Wibes schoͤne wibes ere·
wibes guͤte wibes zvht·
ist fúr war ein eren lere·
minnegerndes herzen svht·
so ist ir hulde·
alles gv̊tes vbergvlde·
Swa ein werdes wib an lachet·
einen minnegernden man·
vnd ir mvnt ze kvssen machet·
des mv̊t mv̊s geliche stan·
hoh der svnne·
sine wunne ist ob aller wunne·