Wol dir ſvmer diner ſvͤſſen·
wūneklichē ſchonē zit·
dv kanſt trurē wol gebuͤſſen·
din kvnft hohgemvͤte git·
dv biſt ſvͤſſe·
da vō ich dich ſvͤſſe gruͤſſe·
Heide velt walt· ang̾ ǒwe·
ſach ich nie bekleidet bas·
vō dem lvfteſvͤſſem tǒwe·
ſint die blv̊mē alle nas·
vogeline
ſingent lop des meýen ſchine·
So ſinge ich vō gv̊tē wibē·
als ich aller beſte kan·
mit ir lop wil ich v̾triben·
ſwc ich vngemvͤtes han·
wibeſ gvͤte·
git mir froͤidenrich gemvͤte·
Wibes ſchoͤne wibes ere·
wibes guͤte wibes zvht·
iſt fúr war ein eren lere·
mīnegerndes h̾zen ſvht·
ſo iſt ir hulde·
alles gv̊tes vbergvlde·
Swa ein w̾des wib an lachet·
einen mīnegernden man·
vn̄ ir mvnt ze kvſſen machet·
des mv̊t mv̊s geliche ſtan·
hoh d̾ ſvnne·
ſine wūne iſt ob all̾ wūne·