Wnneklichen hohe min gemvͤte·
stat des habe min frowe dank·
dú mir mit ir manicvalden gvͤte·
minen mv̊t ie hohe twanc·
dú vil reine svͤsse tv̊t mir so·
dc ich bin in aller zit von herzen fro·
Dú vil gv̊te zweierhande lachen·
lachet dv́ ich nennen wil·
dv́ kan si so minnekliche machen·
dc si sint min herzen spil·
so ich ir svͤsses lachen einest sol·
sehen so ist mir in dem herzen wol·
Eines si mit rosevarwen mvnde·
kan dc ist so minneklich·
dc ein man dar inne froͤide funde·
der ê· nie wart froͤidenrich·
si ist der minnegernden meýen zit·
in ir lachen froͤiden hort der svͤsse lit·
Lachen kan min tvgent richú frǒwe·
mit ir spilnden ǒgen so·
swenne ich mich dar inne rehte schǒwe·
dc ich bin von herzen fro·
swen ir ǒgen gvͤtlich lachent an·
der mv̊s iemer sin ein froͤide richer man·
Mit ir spilnden ǒgen lachen schone·
kan dú reine svͤsse wol·
des trage ich der 244v hohen vroͤiden krone·
als ir ǒgen towes vol
werdent vs ir reines herzen grunt·
von ir lachen sa so wirde ich minnen wunt·
IR vil klein vel wîsser hals ir kinne·
mvnt bra wengel ǒgen liht·
ist der minnen spiegel da man inne·
manger hande wunne siht·
solt ich in den svͤssen spiegel sehen·
zaller zit mir kvnde niemer bc geschehen·
Woldegot solt ich ir hals ir ǒgen·
brústel kinne wengel mvnt·
mit ir gv̊ten willen kússen tǒgen·
hunder tusent tvsent stvnt·
maniger giht des were mir al zevil·
der mit wiben niht kan spiln der minne spil·