Wint̾ wil vns aber twingē·
heide vn̄ ǒch den gruͤnē kle·
ī dē walde vogelin ſingen·
tůnt die kaldē winde we·
doch ſwie krāc d̾ ſvm̾ were·
wint iſt ſo froͤidē lere·
dc er birt noch groſſer ſwere·
mir wer liep das vns v̾bere·
rife vn̄ ǒch d̾ kalde ſne·
Frowe min·
ich wil din
diener ſin·
Ach wc klage ich ſend̾ tv̄mer·
ſit noch groſſer iſt min not·
ich lide al ze groſſen kv̄mer·
ſit dú mīne mir gebot·
dienē alſo reinē wibe·
wol ir mīneklichē libe·
Ob ſi froͤide mir beſchibe·
vn̄ die ſw̾e mir v̾t́be
mit ir liehtē mv́ndel rot·
Frowe min·
ich wil din
diener ſin·
Wūneklichē ǒgen blike·
hāt dc h̾ze min gewūt·
die mich ſmahēt alſo dike·
da vō iſt mir ſoꝛgē kvnt·
ſo ſi loſlich vō mir ſwēket·
vn̄ mich in den iamer ſenket·
vn̄ mich an dē froͤidē krēket·
vn̄ mī h̾ze ī rúwe ertrenket·
dc geſchiht mir tvſēt ſtūt·
Frowe min·
ich wil din
diener ſin·
Mīne twīget âne ſchulde·
mich vil ſendē ſiechē man·
wā ich warb ie nach ir hulde·
dc ich růwe nie gewā·
mīne liebeſ fuͤg̾inne·
ach war tůſt dv dine ſinne·
dien ich dir nah vngewīne·
ſo biſt dv gen mir vnmīne·
ſid ich dienē dir began·
Frowe min·
ich wil din
diener ſin·
Dú vil gůte vn̄ dú vil reine·
mīneklich wol gezogē·
hat niht bꝛeſtē wā ein kleine·
fúr die warheit vngelogē·
ſiſt gen mir ein teil ze here·
in weis da niht wādels mere·
ſwar ich doch der lande kere·
ſo gib ich ir pꝛis vn̄ ere·
ſi iſt an tvgēdē vnbetrogen·
Frowe min·
ich wil din
diener ſin·