Wie ſol froͤideloſer tage·
mir vn̄ ſender iaren iemer werden rat·
ſo iſt dc ab̾ min hoͤhſte klage·
dc vns beide an ſange an froͤide miſſegat·
ſit dc dv́ w̾lt mit ſoꝛgen ſo gar betwungē ſtat·
maniger ſwiget nv der doch dike wol geſvngē hat·
ICh was eteſwenne frô·
do min h̾ze wāde nebent der ſvnnē ſtan·
dvr die wolkē ſach ich ho·
nv mv̊s ich min ǒge nider zer erde lan·
mich trúget al ze ſere ein vil mīneklich̾ wan·
ſit dc ich vō ir niht wan leit vn̄ h̾ze ſw̾e han·
Wil ſi froͤmden mir dvr dc·
das ein lútzel iſt mit valſcher diet behv̊t·
deſt ein ſwacher frúndes has·
dc ſi mit den andern mir ſo leide tůt·
es hoͤꝛet niht ze liebe ein ſo kranker frúndes mv̊t·
wil aber ſi die hv̊te alſo triegē daſt vns beiden gůt·