Wie sol froͤideloser tage·
mir vnd sender iaren iemer werden rat·
so ist dc aber min hoͤhste klage·
dc vns beide an sange an froͤide missegat·
sit dc dv́ werlt mit sorgen so gar betwungen stat·
maniger swiget nv der doch dike wol gesvngen hat·
ICh was eteswenne frô·
do min herze wande nebent der svnnen stan·
dvr die wolken sach ich ho·
nv mv̊s ich min ǒge nider zer erde lan·
mich trúget al ze sere ein vil minneklicher wan·
sit dc ich von ir niht wan leit vnd herze swere han·
Wil si froͤmden mir dvr dc·
das ein lútzel ist mit valscher diet behv̊t·
dest ein swacher frúndes has·
dc si mit den andern mir so leide tůt·
es hoͤret niht ze liebe ein so kranker frúndes mv̊t·
wil aber si die hv̊te also triegen dast vns beiden gůt·