Weſt ich ob es v̾ſwiget moͤhte ſin·
ich lieſſe úch ſehen mine ſchone frǒwē·
der enzwei bꝛeche mir dc h̾ze min·
d̾ moͤhte ſi ſchone dꝛinne ſchǒwen·
ſi kan her dvr dv ganzē ǒgen min ſvnder túr gegangē·
owe ſolde ich vō ir ſvͤſſē minne ſin als mīneklich enpfangē·
Der ſo lange růft in einē tǒbē walt·
es antwúrt im dar vs eteſwēne·
nv iſt dv́ klage vō ir dike manicvalt·
gegē miner not ſwie ſis niht erkenne·
doch klaget ir maniger minen kvmber vil dike mit geſange·
owe ia hat ſi geſlaffen alles her alder geſwigē alzelange·
Wer ein ſitich alder ein ſtar die mehtē ſit·
gelernet han dc ſi ſpꝛeche minnen·
ich han ir gedienet her vil lange zit·
mac ſi ſich doch miner rede v̾ſinnē·
nein ſi niht got enwelle ein wunder vil verre an mir erzeigen·
ia moͤht ich ſit einē bǒn mit miner bette ſvnd̾ wapen nider geneigen·