We war vmbe svn wir sorgen·
froͤide ist gv̊t·
von den wiben sol man borgen
hohen mv̊t·
wol im der in kan gewinnen·
von in der ist ein selig man·
froͤide sol man dvrh si minnen·
wan da lit vil eren an·
Wir svln tanzen singen lachen·
dvrch dú wib·
da mag ein man gemachen·
dc sin lib·
wirdet wert ob er mit trúwen·
dienet gv̊ter wibe grůs·
swen sin dienest wil gerúwen·
dem wirt selten kvmbers buos·
Mit dem wasser man dc fúr·
loͤschet gar·
vinster ist dem svnnen túr·
beidú war·
sint dú mere ir hoͤret mere·
habet fúr war vf minen lib·
rehten man von herzen sere·
scheidet nieman wan ein wip·
Owe owe frǒwe minne·
mir ist we·
grife her wie sere ich brinne·
kalter sne·
mvͤse von der hitze brinnen·
div mir an dem herzen lit·
kanst dv minne· 238v trúwe minnen·
so hilfest dv mir enzit·