We war vmbe ſvn wir ſoꝛgē·
froͤide iſt gv̊t·
vō den wibē ſol man boꝛgē
hohen mv̊t·
wol im der in kan gewinnen·
vō in der iſt ein ſelig man·
froͤide ſol man dvrh ſi mīnen·
wan da lit vil eren an·
Wir ſvln tanzen ſingē lachē·
dvrch dú wib·
da mag ein man gemachē·
dc ſin lib·
wirdet w̾t ob er mit trúwē·
dienet gv̊ter wibe grůs·
ſwen ſin dieneſt wil gerúwē·
dem wirt ſelten kvmberſ buos·
Mit dem waſſer man dc fúr·
loͤſchet gar·
vinſter iſt dem ſvnnē túr·
beidú war·
ſint dú mere ir hoͤꝛet mere·
habet fúr war vf minē lib·
rehtē mā vō herzen ſere·
ſcheidet niemā wan ein wip·
Owe owe frǒwe mīne·
mir iſt we·
grife her wie ſere ich bꝛinne·
kalter ſne·
mvͤſe vō der hitze bꝛinnē·
div mir an dem h̾zen lit·
kanſt dv minne· 238v trúwe mīnen·
ſo hilfeſt dv mir enzit·