We dc mir dú gv̊te·
so vêrret ir minne·
des bin ich in dem mv̊te·
vil ofte vnfro·
sol mir niht gelingen·
an ir der ich singe·
so mv̊s min herze ringen·
mit truren so·
dc ich niemer mere·
ze froͤiden gesinne·
si hat lúzel ere·
stat min herze vnho·
Schoͤne bi der gvͤte·
stat vil wol den wiben·
so stat ouch hoh gemvͤte
den mannen wol·
hohgemvͤte wolde·
vil gerne beliben·
bi mir het ich si holde·
von der ich dol·
herzecliche swere·
da von mv̊s ich miden·
vil froͤiden der mir were·
sus min herze vol·
Ja man ich vil sere·
fǒwe dine gvͤte·
dc dv mich dvr din ere·
bedenkest bas·
la mich genade vinden·
dc dich got behvͤte·
an dir so mv̊s mir swinden·
der minne has·
dú ist mir gevêre·
da von min gemvͤte·
vil froͤiden lere·
gv̊t wib wende das·