Walt vnd ǒwe vnd dú heide·
die stent aber in wunneklicher wat·
in der schǒwe· liehter kleide·
sich der anger nv gewarnet hat·
ellú vogelin sint vs leide·
sost des veldes ǒgenweide·
wol gezieret mit der gruͤnen sat·
Manigen wundert· wes ich trure·
alde von weme ich habe die senden klage·
ich han hundert nachgebvre·
dien ich doch der mere niht ensage·
ist in wille gen mir sure·
so nimit mich des kein wunder·
ob ich gen ir holdes herze trage·
Lieb an ende· vor in allen·
ich han iemer mich zů dir vpfliht·
lieb nv wende· maniges kallen·
maniger sprichet si gewer mich niht·
dc ist ein vngefuͤges schallen·
moͤht aber ich ir wol gevallen·
sone růchte mich wc ieman boͤser giht·