Swer mir schade an miner frǒwen·
dem wúnsche ich des rises·
dar an die diebe nement ir ende·
swer min dar an schone mit trǒwen·
dem wúnsch ich des paradýses·
vnd valde im mine hende·
vrâg ieman wer si si·
der bekenne si da bi·
es ist dú wolgetane·
genade frǒwe mir·
der svnnen gan ich dir·
so schine mir der mane·
Swie min not gefuͤger were·
so gewnne ich liep nach leide·
vnd froͤide manicvalde·
wan ich weis vil liebú mere·
die blv̊men entspringent an der heide·
die vogel singent in dem walde·
da wilent lag der sne·
da stat nv gruͤner kle·
er tǒwet an dem morgen·
swer nv welle der froͤiwe sich·
nieman noͤt es mich·
ich bin vnledic von sorgen·