Swer mir ſchade an miner frǒwen·
dem wúnſche ich des riſes·
dar an die diebe nement ir ende·
ſwer min dar an ſchone mit trǒwen·
dem wúnſch ich des paradýſes·
vn̄ valde im mine hende·
vꝛâg ieman wer ſi ſi·
der bekenne ſi da bi·
es iſt dú wolgetane·
genade frǒwe mir·
der ſvnnē gan ich dir·
ſo ſchine mir der mane·
Swie min not gefuͤger were·
ſo gewnne ich liep nach leide·
vn̄ froͤide manicvalde·
wan ich weis vil liebú mere·
die blv̊mē entſpꝛingent an der heide·
die vogel ſingent in dem walde·
da wilent lag der ſne·
da ſtat nv gruͤner kle·
er tǒwet an dem moꝛgen·
ſwer nv welle der froͤiwe ſich·
niemā noͤt es mich·
ich bin vnledic von ſoꝛgen·