Ich var mit úweren hulden herren vnd mage
lút vnd lant die mvͤssen selig sin·
es ist vnnot dc ieman minr verte vragen·
ich sage wol fúr war die reise
mich vieng dú minne vnd lie mich varn vf mine sicherheit·
nv hat si mir enboten bi ir liebe dc ich var·
es ist vnwendig ich mv̊s endelichen dar·
wie kvme ich breche mine trúwe vnd minen eit·
Sich růmet maniger wc er dvr die minne tete·
wa sint dú werk die rede hoͤre ich wol·
doch sehe ich gern dc si ir eteslichen bete·
dc er ir diente als ich ir dienen sol·
es ist geminnet der sich dur die minne ellenden mv̊s·
nv seht wie si mich vs miner zvngen zúhet vber mer
vnd lebte min her salatin vnd al sin her
dien brehten mich von vraken niemer einen fůs·
IR minne singer ú mv̊s ofte misseligen·
dc iv den schaden tůt dc ist der wan·
ich wil mich ruͤmen ich mag wol von minnen singen·
sit mich dv́ minne hat vnd ich si han·
dc ich da wil seht dc wil alse gerne haben mich·
so mvͤst ab̾ ir verliesen vnderwilent wanes vil·
ir ringent vmbe lieb dc úwer niht en wil·
wan mv́get ir armen minnen solhe minne als ich·