Hoͤuesche frowen hohgemvͤte·
hant ze botten ivngen mannen mich gesant·
dc ir helfe in kome ze gůte·
also dc si noh froͤide bringen in dú lant·
vnd ich mich des fúr si zegisel gebe·
dc sis an alle schulde sin ob ieman trureklichen lebe·
Dannoh baten si mich mere·
künde […]] die werdeklicher minne gern·
dc si dvr ir selber ere·
spottes vnd lugelicher mere enbern·
swer mich des ane valsch dvrh si gewert·
der habe gemeine ir aller wunsch dc er erwerbe swes er gert·
Solde ich iemer froͤide erwerben·
an ú froͤiderichen dc were an der zit·
lat si ivgent an mir verderben·
sost liht alles dúrre dc nv gruͤne lit·
swer schiere git dar nah so man sin gert·
als ich die wisen hoͤre iehen dú gabe ist maniger gabe wert·