FRowe seldenriche·
wie mvget ir so langes leit an mir vertragen·
tůt so selicliche·
vnd lat mich niht an froͤiden gar verzagen·
wan verderbet ir mih so·
dc wirt iv verkeret von den besten die noch gerne weren fro·
Frowe ich bin der eine·
der sich niemer tag von iv gescheiden wil·
sol dc helfen kleine·
dar zv̊ were doch der gvͤte an iv zevil·
ich weis wol ir sit so gůt·
dc mich noh ein hoh trost von iv machet hoh gemv̊t·
Frowe ich ger niht mere·
wan so vil vnd wurde das· so wer hin
al mins herzen sere·
von der ich niemer tag gescheiden wil·
dc ir úch mich nemet an·
vnd ich úch lieber were danne ein ander man·
Frowe ob ich verdirbe·
wc habet ir oder ieman deste me·
vnd ein leit erwirbe·
dc ir selbe mvͤzet sprechen we·
wie han ich sus getobet·
dc ich den verderbe der mich vnd ander frowe dike hat gelobet·