FRowe ſeldenriche·
wie mvget ir ſo langes leit an mir v̾tragē·
tůt ſo ſelicliche·
vn̄ lat mich niht an froͤidē gar v̾zagen·
wā v̾derbet ir mih ſo·
dc wirt iv v̾keret vō den beſtē die noch g̾ne weren fro·
Frowe ich bin d̾ eine·
d̾ ſich niem̾ tag vō iv geſcheidē wil·
ſol dc helfen kleine·
dar zv̊ were doch d̾ gvͤte an iv zevil·
ich weis wol ir ſit ſo gůt·
dc mich noh ein hoh troſt von iv machet hoh gemv̊t·
Frowe ich ger niht mere·
wā ſo vil vn̄ wurde das· ſo wer hin
al mins h̾zen ſere·
von der ich niemer tag geſcheiden wil·
dc ir úch mich nemet an·
vn̄ ich úch lieb̾ were dāne ein and̾ man·
Frowe ob ich v̾dirbe·
wc habet ir oder iemā deſte me·
vn̄ ein leit erwirbe·
dc ir ſelbe mvͤzet ſpꝛechē we·
wie han ich ſuſ getobet·
dc ich dē v̾derbe d̾ mich vn̄ and̾ frowe dike hat gelobet·