Surgebat quercus sublimi in culmine montis,
Radicesque imo in viscere condiderat;
Atque super reliquas pandebat brachia plantas,
Despiciens hederas et calamum et salicem.
Acta sed irato stridens aquilone procella
Glandiferam totis nisibus aggreditur;
Turbine et avulsam horrifico radicibus altis
Sternit humi: magno mons quatitur sonitu.
Ast hinc inde caput viburna et mollis arundo
Flexerunt, ruptis nec jacuere fibris.
O juvenis, robur qui jactas, exitiosas
Ipse ex hoc vires disce timere tuas.