Quique ministeriales stirpe sibi sociales
Iuncti funere tristi templi menia sancti
Competiere nepoti querere munia busti.
Sed vetuit cetus, nisi pro causis fieret ius.
5Vox populi clamat, quod terram non sibi pandat
Ni medium cernant, pressis qui debita reddat.
Propterea reduces vectarunt corpus in edes.
Tum precibus partim sedarunt, munere partim,
Que populi maior poscebat debita clamor.
10Post revocant clausis curandum funere causis,
Cui tribuunt tumulum non digne sat prope templum.
Quod poterant homines, duras in conditiones
Pro modulo rerum non segnes exhibuerunt.
At superis regnans et mundi sceptra gubernans
15Corpus demone torquens, ut pateant anime res,
Quam fuerint arte, cui vas fert tortor aperte.
Noctis tempore semper portans ille cadaver
Id variis aut huc furiis aut transtulit illuc,
De laribus villarum poscens contiguarum
20Huic prius heu notorum commoda serviciorum,
Hic, referunt, dicens: "Quo victima, quam michi debes?"
Hic: "Modium comiti cur," inquit, "non tribuisti?"
Seu stomachans: "Bannum non curasti michi dandum!"
Sic misero cuidam: "Fer ius, michi ducito vaccam!"
25Hinc rediens lato giro per plurima facto
Artus condidit ultro, quo tulit ante, sepulchro;
Nec fuerat reditus cicior nec serior eius,
Quam sonuit signum nocturni temporis ymnum,
Vt sonus hic busto fieret non absque sepulto.
30Sic memorant factum, sic noctu sepe notatum.
Laus Domini fregit, quas res ars demonis egit:
Numquam tempore laudum fecit funere ludum
Et fugiens fossa deponebat prius ossa.
Ast remeans tumulo minabat turbine multo
35Omne genus pecoris, variis id duxerat horis.
Quos veniens vel iens adit, horror defugat ingens.
Effert martyris hec res cum formidine vires,
Qui spoliis rerum numero perplure dierum
Hunc populis eius durum non plectere peius
40Vltor plebibus ipsis quam queat indiciis his,
Ne lateat tales suamet fraus officiales,
Discant, quo duce vadant, qui male non sua radant.