Egra soror comitis tutoris nomen habentis,
Mater splendida stirpis Sulbacio dominantis,
Cuius filia Greci scandit culmina regni,
Fratris menia visit, quam perducere iussit,
5Quo tumulum sacrum vidisset martyre clarum.
Illuc dum venit, acri decidit obsita febri,
Qua gravius languens iam mortis limina tangens
Are tradidit aurum gemmis structile purum,
Quo lapidum bis sex par offert ipsamet index.
10Hinc calicem vidi nunc aptum martyris edi,
Raro tam breve vas, tam claro scemate cernas.
Qua nitida scala pedibus de gutture tensa
Per celebres comitissa dies comis fuit ipsa,
Fulgens ordine gemmis lucida bis duodenis.
15Demum morbida partu fudit funera planctu
Vnde nimis comes Otto dabat studium, iaceat quo
Ipsa soror tumulo celebri, sua stirps pateat quo.
Mos habuit, matres in partu deficientes
Ne subeant sacrum limen tunc ecclesiarum,
20Dum memorans ipsas dat commendatio missas.
Quod vetuit heri ceu parcens ille sorori.
Fit pietas persone dampnum religione,
Munus funebre sacris defert gloria fratris.
Illud spreverat abbas non templi temerans fas
25Quod comes ex ditione peregerat ambitione,
Fert graviter totis hoc fratrum contio votis,
Que famulans edi dolet hanc de funere ledi.
Cui renuens morem defensor tollit honorem.
Res eadem maiores prebens nempe labores
30Post etiam sacras infringi fecerat aras.
Eius turbinis auctor nutans fit vice tutor,
Vi temerans templum, vi curans restituendum,
Quod minimum reverens nec commaculasse pavescens,
Quem tumide sprevit, penas a martyre sensit.