Heros germinis ortum ducens stemmate comptum
Ius tenuit sacre tutari predia tumbe,
Qui ferus impietate tulit quam plurima late.
Nam spoliis populi bos ibat crebrior illi,
5Qua pecudum captura carnes huic dabat hora
Vndelibet raptas, civili crimine captas.
His epulis turgens hinc edes expetit amens,
Qua positus tumba presens martyr gerit alma.
Advenienti se gravis ultio martyris offert,
10Necdum limina templi tangens tristia perfert.
Plenus demone pectus, heu que iurgia questus,
Quin suamet cunctis clamabat crimina gratis.
Re nimium mira mugitus pars dabat ima,
Vno scilicet ac si plures carcere clausi
15E stabulis tauri mugirent gutture rauci,
Sic sonuit cavea grex multi demonis una,
Tam reboans iusum capto quam corpore sursum.
Qua videas plaga, quoniam censet Deus equa,
Quem sapiens iusta compenset debita libra,
20Quam patiens iudex martyr sit, crimine vindex.
Ecce pius pater ipse scelus repetens tenuit ius.
Ille comes ferus ante reus pecudum rapuit plus,
Vnde bubus parilis puduit miser et patuit plus.
Sub manibus nutans astantum ducitur intrans
25Ad populis sacram, quam tractus circuit, aram.
Dum vicibus multis hic circumducitur amens,
Tandem reddita responsum dictis dederat mens,
Non rediens plene, sed sensu famina pandens,
Vt saperent auri, fluerent aut rectius ori.
30Cui penitus sibimet reddendo cum studium dent,
Consiliantur cari causas annichilari,
Quas voluit niti contra ius nobile templi
De manibus regni non eque suscipiendi.
Illas protinus abiurans non scandala sanat,
35Non adeo lesi sensus tunc naufraga tranat,
Vt mox passio vexet captum, nec requiem det.
Tunc iterum suadent, quo predia publica donet,
Ipse ducis feudo tenuit que debita templo.
Hec redibens sanctis restaurat perdita mentis.
40Is locuples pagus sparsos per iugera mansus
Si releget, centum simul undenis vicibus sunt,
Quod decies septem mansus gens Norica dicet.
Dux tulerat terras Arnoldus pestifer istas,
Nisus scandere vi, non lectus culmina regni
45Ac temerans veterum tunc plurima cenobiorum.
Hinc spoliis celi iam florent robora secli,
Que lacerant matrem, dum certant ponere patrem,
Non placitum matri, lectum vi Simonis atri,
Pro canonum parma cui rex synodo ciet arma.
50Turbant intima, scindunt extera. Cur? Siluit lex.
Miscent dissona, findunt consona, ius necuit fas.
Quo, Deus, omne, pater, seclum turbo rapit ater?
De veteri preda retinet martyr tamen illa
Arva, comes que reddit, quem tum demone solvit,
55Cogens verbere strictum templo reddere vicum,
Qui glomerans plebes nunc est pretoria sedes.
Sic utinam multos direpto cespite fultos,
Alme Deus, raptas compellas linquere terras!
Rus noviter scissum binis in curtibus ipsum,
60Quod rediit signo, servit iam fenore digno
Pro placito fratrum, qui servant carmine sanctum.