Nunc hederis sertisque novos innecte corymbos,
nunc tua circumdent tempora, Bacche, rosae,
nunc viridis flavas suspendat pampinus uvas
itigeminetque novas ebria mensa dapes;
nam mea Parnasi rediens e collibus audet
ludere Romanis Calliopea modis
inque choro iuvenum molli saltante puella
sopitos longo tempore ferre sales
Aoniumque movet circum tua pocula plectrum
« Euhoe, Bacche», canens, «ad tua festa veni».
Tu quoque nobilibus pretium iam, laure, poetis,
laure, tuum nobis porrige fronde decus;
et mea Phoebeis ornentur tempora sertis,
ut merear nomen vatis habere novi.
Stultus ego, fieri credam qui fronde poetam :
Non laurus vatem, sed sua Musa facit.