Ec quod conspicuum novumque sidus,
Caelo fundere coepit è sereno
Luminis radios benignioris,
Atque omnem exhilarare luce mundum!
Toto denique quotquot estis orbe,
Vos ô plaudite, nobiles poëtae
Omnes, omnibus atque cum poëtis
Musae plaudite: vestra res paratur.
Nam regum optimus ille, principumque,
Cunctarum pater ille gratiarum,
E cujus animo redundat omnis
Fons et copia liberalitatis,
Totus pectore, totus ore candens,
Blandi, blandus uti solent olores,
Et dum prima animos sinebat aetas,
Qui canebat, uti canunt olores.
Pastor ille benignus, ille Clemens
Vatum sidus et est, ut est olorum.