Secunda coelo Roma, perennia
Quam jura dantem quadrijugo vehit
Hinc Africa Europeque supplex,
Inde Asia Americeque curru,
Olim cruentis non sine proeliis
Frenare terras aspera, nunc potens
Pacis sacramento quietae
Belligeras cohibere gentes.
Nec omne terram prospicit undique
Coelum, nec omnis parturit omnia
Tellus, et in magnis relucet
Discolor ingeniis venustas.
Te mite coelum, te Genius loci,
Et quae bonorum copia plurimo
Se fundit e cornu, colendis
Moribus ingenioque blandam
Fecere matrem. Non tibi nubilae
Mentes: sed, album quae generosius
Bibere solem, sunt aperto
Pectora candidiora coelo:
Yerique pugnax et nivei vigil
Pubes honesti: fulgurat indoles
Yultuque, cultuque et fideli
Non dubius sedet ore candor.
Sunt et benignae quae bona pectoris
Ornant Camoenae. Non veteres ego
Vates et ignotas amico
Carmine sollicitabo manes:
Testis mearum vivida Bencii
Thalia laudum: testis amoenior
Argenteis Gdllutiorum
Barbitos insonuisse nervis:
Testis, feroci qui premit impetu
Papiniani proelia pectinis
Donatus: heu testis tragoedi
Postuma Calliope Stephoni,
Divesque Stradae cultus, et integer
Guinisianus candor, et aurei
Lepos Petruci, aut qui Latino
Dulce fluit Godefiddus ore.
Quamquam nec annis desit idonea
Campoque pubes: et tibi Thracium
Deproeliaturos tyrannum
Magnanimos Latium nepotes
Cultuque et almis educat artibus;
Qui regna Cypri, qui Rhodon asserant
Annis, Palaestinosque colles,
Et Solymi juga parricidae.
Vidi Latinas, vidi ego ludicro
Late phalangas fervere proelio,
Primi rudimentum Gradivi,
Dum Ligurum Allobrogumque quondam
Urbanus acres non sine numine
Componit iras, cum fera militum
Ferrara vicinum quietis
Eridanum monet esse ripis.
Heu, quanta bello robora! non mihi
Indictus olim vixeris, altius,
Torquate, fraterna sonari
Digne lyra, comitum propago,
Torquate regum. Te Latiis gravem
Bohemus armis, te validum leves
Sensere Daci: tu, perempti
Non humilis socius Buquoi,
Tunc Vaticano primus in agmine
Pugnam docebas; qualis adhuc rudem
Chiron Achillem, qualis alto
Aemona Protesilaus Haemo.
Dicent columnas, qui gravioribus
Dicent Camoenis edomitum mare, et
Opima Naupacti tropaea, et
Ausonio pia bella ponto.
Non et sonandus non geminus pari
Ursinus oestro? sed bene credidit
Imbelle plectrum, non pharetram,
Aut habilem mihi Phoebus arcum.