Aut nos avarae vendidimus Tyro,
Aut usque Thulen misimus exules
Cultus avorum. Non honoris
Praecipiti libet ire clivo:
Non sceptra Pyrrhi, non Agamemnonis
Leto pacisci: non Halyattici
Vejente permutare saxo
Uber, Achaemeniumque Tigrim.
Nescit severo livida brachia
Signare ferro: nescit idoneis
Tiro reluctantem lupatis
Frangere equum, metuitque torvum
Tranare Tibrim, cum nivibus satui-
Exaestuanti frena licentiae
Permisit, emovitque ripam
Assiduae metuendus Urbi.
Quod si procacem fregit equus gradum
Micatque nervis et genibus tremit:
At non Lupercales iisdem
Nescius assimulare saltus,
Et, cum peritum sistra citant pedem,
Doctus choreae. Frangite barbita
Nervosque, dementemque buxum
Faemineo prohibete cantu.
Auditis? Istri littora personat
Ferale cornu. Jam capita Alpium
Magnaeque respondere montes
Ausoniae; novat arma Mavors,
Urbesque tectis elicit. Ibimus?
An nos Caleno mensa tenet mero,
Coenaeque regnorum redemptae
Divitiis populique censu?
Quas cum recedens viderit Hesperus,
Surgens easdem Phosphorus adspicit;
Et ridet adspecto renidens
Luna mero, radiosque tingit:
Dum nos Lyaeo regificis super
Descriptq mensis proelia pingimus,
Fusoque metamur Falerno
Moenia, diluimusque fossas.
Surgamus. Indo lutea Nereo
Sublucet Eos: jam radiantium
Flatus quadrigarum, et citatae
Oceanum pepulere plantae.
Surgamus. Omnes prima vocat dies,
Et Phoebus: at non noster ab Indiis
Phoebus, Quirites, nec Latino
Orta dies famulatur orbi.
Totumne diris mane Othomanidis
Impendet aether? pro pudor! Occidens
Nobis fatigatusque tantum
Hesperium prope Phoebus axem
Turpi Latinis vespere serviet?
Surgamus: Oetam Gadibus et Paron
Addamus, Auroramque Nocti et
Bactra Tago, Tiberique Gangem.