Non solus olim praepes Horatius
Ibit biformis per liquidum aethera
Vates, olorinisve late
Cantibus, Aeoliove terras
Temnet volatu: me quoque desides
Tranare nimbos, me Zephyris super
Impune pendere, et sereno
Calliope dedit ire coelo,
Et qua licebit nubibus et sacrum
Vulgare coelo carmen, eburneam
Lyramque suspendens, tubamque
Colla super, niveisque leves
Plumis lacertos. Me nec inhospita
Sistent oborti littora Nerei,
Kupesve inaccessae ferarum, aut
Verticibus scopulorum acutis
Armata Tethys. Me juga Caucasi,
Me canus Atlas, me mare barbarum,
Lateque dejectis uterque
Audiet Oceanus procellis.
Ut se quieto cuncta silentio
Stravere late! Pieriae simul
Fontes Amymonae, et canoris
In numerum cecidere lymphis
Doctum fluentis murmura Penei,
Sacroque Nysae e vertice tympana,
Lyraeque, buxique, et remista
Cum lituis citharisque plectra
Fregere nubes. Hinc Tibi gloria
Late per orbem differet aureum.
Urbane, nomen: qua corusco
Concutitur Jovis aula curru,
Septemque sese sideribus pigrum
Evolvit aevum. Protinus ultimis
Afris, coronatisque Serum
Moenibus, Oceanoque rubro
Noscere magnus. Jam Tibi tinnulus
Fert sistra Nilus: jam Berecynthia
Curetes aera, jam frementes
Rauca crepant Corybantes arma.
Te Vaticanis Maurus et Aethiops
Affusus aris, Te tepidi canunt
Devexa mundi, Te remotae
Littora personuere Chrysae.
Magnusque late diceris arbiter
Coelumque, Terrasque, et Maria, et Styga,
Amnemque Cocyti severum, et
Elysiam cohibere Lethen.
Tibi (benignae si qua fides spei)
Sternentur olim magnanimae ad pedes
Gentesque Regesque. O caduci
Praesidium columenque mundi,
Jam nunc labantis pondera saeculi, et
Deproeliantum funera principum,
Pronasque regnorum ruinas
Consilioque humerisque siste.
Tardum sereni partibus aetheris
Te Sidus addas; neu properes citus
Mensis reclinari, et faventum
Ambrosiae accubuisse Divum.
Sero receptum Eoma flea„t Patrem,
Tuisque longum vivere moribus
Possint Quirites, possit ingens
Curia, purpureique Patres.
Diuque gaudens et cupidus Tibi
Incumbat orbis: certus ames Remi
Urbemque prolemque, ac merenti
Quamquam avidus Tibi debet aether,
Reposce Divos praemia lentior:
Paullumque differ sidera, dum Tagum,
Dum Baetin, undantemque bello
Eridanum, Ligerimque places;
Dum fracta septem cornua montibus
Submittat Hebrus; dum Tibi Thessalum
Ducat catenatus Tyrannum in
Perniciem opprobriumque Fastus.
Jam tum tropaeis et senio gravem
Aurata stellarum ad Capitolia
Longis revertentem triumphis
Signiferae vehat axis aulae.
Quo, Musa, vatem, non memor Icari,'
Tollis relapsurum? his potius gravem
Depone ripis, et dolosas
Deme humeris digitisque plumas:
Tibrimque propter ducere languidos
Permitte somnos, et super ilice
Lyramque pendentemque buxum
Ambiguis fluitare ramis.