Non auro, neque tinnulis
Pugnandum phaleris: et chlamydum sinus
Et nodos, et inutiles
Gemmas belligeris demite brachiis.
Quid laevem galeam juvat
Plumarum volucrem ferre superbiam?
Cur sparsas agitat jubas,
Et conus tremulis annuit Africis?
Cur tectum pavidam caput
Ementitur avem, cum leve sibilis
Aurarum et Zephyri joco
Furtum Mygdoniae proditur alitis?
Jam grando chalybum imminet,
Telorumque frequens aura volantium
Imbelli galeae insonat :
Jam Martis tonitru mugit, et obvium
Medi fulgur acinacis.
Quid prosunt phalerae? quid galeae jubar
Quid laetae Zephyris comae?
Aut umbo clypei quod procul aemulis
Lucem solibus invidet?
Quid vultus nimium sedulus adspici?
Quid pictus pharetrae timor?
Aurum frenigera rejice dextera:
Ferro res eget et manu,
Et magnis animis. Haec tuleris tria;
Dicam Geryoni parem,
Quem nec populifer proruat Hercules,
Nec coelo nimius Mimas,
Nec dura Idomeneus, aut Sthenelus manu.
Bellis adsit idonea
Incomptae facies lege ferociae,
Quam fuci decor abstinens,
Lascivaeque carens forma proterviae,
Et ferri memores genae,
Hesternique notent vulnera proelii.
Cristae non facient virum,
Non arguta suis colla coralliis.
Thoracas pavor et metus
Dicuntur Siculis fingere malleis,
Et primi scopulis super
Procudisse vagis scuta Cydoniis.
Non stultum tegimur caput,
Et leto tenues objicimus moras.
At quos eruerit sibi,
Directis oculos invida spiculis
Mors affingere creditur.
Fatis mille loci, mille patent viae :
Sed signat jaculis locum,
Qui vultum subitis dimovet ictibus,
Devotumque mori latus
Objectu tremulae protegit aegidis.
Nudos bella pavent viros:
Audentes animos ipsa volunt prope
Declinare pericula.
Cum consanguineae ferrea Graeciae
Hector rumperet agmina,
Torvis saepe genis turbidus obvios
Fati terruit impetus.
Quos fortuna timet, vitat; et acrium
Differt proelia mentium;
Et mors saepe viris invidet auream
Famae pandere semitam.
Quod si belligera cesseris orbita,
Post te fata citaveris,
Ostendesque neci, qua fugies, viam