At non supino semper in otio
Perdemus aevum. Surgite, Dardani
Cives, triumphatumque captis
Imperium reparate Grajis.
Implete classes, tendite carbasa,
Inferte remos: ite volentibus
Fatis, Quirites, ite: ventis
Vestra tument animisque vela.
Est, qui locantem bella pecuniam,
Novisque rebus postulet utilem
Nervum? Quis erumpentis auri
Fluxit ager potiore vena,
Cuniculosi montibus Orici?
Ferro, Quirites, si lubet, abditum
Mercemur aurum. Qui vibrati
Glandibus emeruisse plumbi
Gazas potentum sciverit urbium,
Hic magna parvo lucra paraverit
Sumptu: nec exponetur aurum,
Nec Tyriae Cypriaeve merces,
Quas non cruentus Martis emat chalybs
.Seu per reluctantum agmina Bistonum,
Et per recedentes Gelonos
Vulnifico pluit aura nimbo:
Seu fulminatis diruta molibus
Castella densis bella tonitruis
Emoliuntur, cum caduco
Moenia concutientur igni,
Capique versis turribus annuent
Arces, et omnis copia, et obice
Centum catenarum gementes
Divitiae pedicisque ferri.
Jam paene gazis Bactra timent suis:
Jam dives Aule, jam Cythereiae
Conchae, Mvcenaeique census,
Et Tyros, et Genoessa flavo
Pallescit auro. Jam prope decolor
Albet superbis Creta coralliis;
Phthieque, et interfusa Cypros,
Ditibus ingemuere ripis.
Est, quem comantum gratia montium,
Aut floridorum tangit amoenior
Vultus viretorum, vel uda
Mobilibus Cynosura rivis?
Hunc empta multo sanguine recreent
Tempe, vel acri Pelion aut Samos
Asserta bello, vel virentis
Silva Cragi, vel opaca leni
Pangaea quercu. Nec viridem Gnidon,
Altamque Dymen spreverit, aut retro
Spissis coronatam salictis
Olenon, umbriferamque Tricen.
Non lympha Cydni, non vitreus Meles,
Lenisve puro Lydius agmine,
Non mite crystallum Lycormae,
Non gelidis Arasinus undis
Desiderantem non bene lubrico
Soletur amni, si modo bellica
E strage fumantes capillos,
Et tepidus linat ora pulvis.
Est, qui supina certet amystide
Obliviosum ducere Liberum?
Hunc Lesbos, liunc vinosa Crete,
Hunc Paphii rogat ora Cypri,
Laxare ferrum. Nec Iihodos abnuit,
Nec, non severi strenua Caecubi
Naxos: nec illaudata Trachin,
Aut resides Amathuntis arces
Nolent cruentis ictibus asseri;
Aut qui propinquis aethera rupibus
Affectat Edon, aut maritus
Vitiferis Aracynthus ulmis.
Est, cui supellex, et vigil ignibus,
Risit caminus? cui pecorum placent
Armenta? cui late reductus
Hinnit ager, fluviique balant
Cantu sonori blandius Orphei?
Illum juvencis postulat hospita
Pleuros, Cleonaeique colles,
Et pecorum studiosa Throezen,
Caeaeque valles, vel Calydoniae
Dumeta silvae, vel redeuntibus
Saltata Gortyne capellis,
Cum roseus tegit arva vesper.
Si quis virenti limina marmore,
Saxoque postes et laquearia, et
Fingat pavimentum, Caryston
Et variam Salamina justis
Reposcat armis. Huic Phrygium prope
Baccata longis Attica collibus
Descendet in tectum, et videndae
Porticus adjicietur aulae.