Nullus effrenae rabiem juventae
Aestus Aetnaei superet camini:
Nulla conceptos jaculantis ignes
Ira Vesevi.
Crescit infestis animosus ausis
Ardor, et primae juvenile vitae
Robur, adversum sibi, luctuosis
Dissidet annis.
Sic ubi densis Aquilo procellis
Bella montanis meditatur Euris,
Et potens igni Notus, et sonorus
Imbribus aether:
Hinc repentinos struit aura montes;
Inde bacchantum patiens procellarum
Ingemit littus resonumque saxis
Tunditur aequor.
Fervet hinc illinc inimica Tethys;
Pacis incertus, dubiusque belli
Fluctuat Pontus, cui militares
Instruat undas.
Mollior laesi tamen ira Ponti,
Lenior motis Aquilo procellis,
Puberum, Juli, quatiente coecas
Turbine mentes.
Hic ubi pugnax equitavit Auster,
Incitae remis volitant carinae,
Quas leves aurae, facilisque veli
Trudit Iapyx:
Quae semel certo metuendus arcu
Fixis aut recti timor, aut cupido,
Rara pacatis agitata sidunt
Pectora curis.
Fortius pugnes juvenum domando
Spiritus, quam si juga feriatis
Induas tauris, vel equina Poeno
Frena leoni.
Jure florentes moderaris annos
Lyncei: duris merito lupatis
Corripis frenum, spatiique parcum
Flectis ephebum.