Et sitim sedat liquor, et relaxant
corda languentum latices Thyonei,
otium fessos levat, ast amantum
pectora carmen.
Tu meos seda, o Erato, dolores;
fas sit et tecum residere, fas sit
carmen audire insolitum et te ab alta
rupe canentem :
« Imperat coelo pater ipse divùm,
imperant di semideique terris,
imperat ponto Enosigaeus, imis
Orcus Avernis;
At polo et terris, Èrebo marique
imperatque et dis Amor. Huius orbis
paret edicto superique et omnis
grex animantum;
hoc sine et coeli status et deorum
pax ruet, terra hoc sine, pontus, aer
et laborabunt odio et suapte
mole dehiscent.
Urbium custos Amor omniumque
gentium rector placidaeque pacis
auctor et leges moderatur, aequo et
iure gubernat.
Huius et iussu seges, huius arbor
induit florem, statuunt volucres
niduin et in prolem pecudes feraeque
sponte feruntur;
hoc duce et virgo sequitur maritum,
et domo et matris gremio relictis;
hac ope humanum genus et propago
cuncta perennata.
Huius, o huius mihi mite numen,
mite sit regnum, dea, sit benignum
sidus; o assis facilis precanti,
dux bone amantum.