Lumen clarum rite fulget
Orto magno sidere
Quod per totum splendet orbem,
Umbras noctis aufugans,
Christo nato Rege magno,
Totus orbis gaudeat.
112.1651C| Dux de Juda, quem propheta
Olim jam praedixerat,
Laetus nobis ecce venit,
Bethlem nascens inclyta.
Christo nato Rege magno,
Totus orbis gaudeat.
Hunc regalis virgo mater,
Partu gaudens edidit.
Quem Gabriel nuntiavit,
Salvatorem gentium.
Christo nato, etc.
Cum pastores excubantes
Cura mordet nam gregis,
Clarus ipsos ad laetandum,
112.1651D| Exhortatur nuntius.
Christo nato, etc.
Concinebat angelorum,
Turba laeta laudibus.
Terrae pacem praedicantes,
Coelo reddunt gloriam.
Christo nato, etc.
O stupendum mirandumque
Sacramentum gloriae.
Quod Tonantem supra cuncta,
112.1652A| Virgo gestat parvula.
Christo nato, etc.
Factor coeli, terrae factor
Vulva est clausus feminae.
Auctor summus angelorum,
Fit praesepe conditus.
Christo nato, etc.
Palmo coelum qui metitur,
Terram claudit pugili [pugillo].
Pannis paucis obvolutus,
Infans vagit parvulus.
Christo nato, etc.
Quae divisit lucem ab umbris,
Summi primum dextera,
Matris mammas ecce tractat,
112.1652B| Lactis potum quaesitans.
Christo nato, etc.
Os praeclarum Conditoris,
Quod formavit saeculum,
En admotum nunc libenter
Sugit matris ubera.
Christo nato, etc.
O beata mater Christi,
David stirpis femina.
Tu laus orbis et regina,
Laeta virgo Maria.
Christo nato, etc.
Votis adsis tu piorum,
Omne servans saeculum.
Patriarchis et prophetis
112.1652C| Laus corona gloriae.
Christo nato, etc.
Ecce sperant laetabunda,
Angelorum agmina.
Christi plebem quod gubernes,
Arcanorum conscia.
Christo nato, etc.
Nam te, Virgo caelebs nupta,
Sexus omnis appetit.
Tu parentes atque natos
Deprecando protege.
Christo nato, etc.
Gaudet coelum cum supernis
Angelorum millibus.
Omnis terrae plenitudo,
112.1652D| Pontus, astra, flumina.
Christo nato Rege magno,
Totus orbis gaudeat.