QUI partas Proavis opes et Arcas,
Et CERAS et Imagines, et Aulas,
Et quas Sidonio recocta vestes
Fucat Purpura nobilis veneno;
Et quos prodigus alteros parabat
Fortunae sinus hinc et hinc favores;
Et mille altera, iusseras cupitis
Quondam cedere PAUPERUM lacernis:
Perge hunc, BORGIA, perge amare morem;
Et prae carmine Nobili Maronis,
Hos amplectere PAUPERIS libelli,
Vultu non nimis abnuente, versus.
Iam mortalibus expeditus aulis,
Calcas sidera perditasque gaudes
Tam large tibi foenerasse gazas;
Dum spreti DUCIS, unicus, priores
Pensavit titulos, BEATUS, omnes.
O magnum tituli lucrum abdicati!
ILLUSTRIS minus este credereris
Iam, FRANCISCE; nisi approbante Caelo
ILLUSTRISSIMUS este desiisses.