LOIOLAE comes et cliens, Eois
Magnum gentibus, ultimaeque fuscis
Exortum iubar Indiae colonis:
Caelesti placidos ab axe vultus
Huc advertere ne gravare: Magno
Indignus LIBER indiget Patrono:
Maiori tamen AUCTOR. Ille totos,
Queis, Maura cute et ore nigricantem
Portasti Aethiopem arduus, sibi alter
Supponi rogat Aethiops, lacertos.
Quamquam non eget aequoris minacer,
Portari per Atlantici procellas,
Nec Scillas per, et invias charybdes:
Sed VITAE per inhospitae, nocentes
Plus mille insidiis dolisque, Syrtes.
Hic Atlante opus est, et hic patrono:
Quem si non potis est habere uterque
Et Libri simul AUCTOR, et LIBELLUS;
Prona est optio: Dum iuvetur unus
Te, Francisce, suo AUCTOR a patrono:
Toti fas erit interire LIBRO.