Pace reformata, regum sua quisque revisit,
Tela relicta iacent, rura colonus habet.
Francorum patuit probitas, exercitus omnis
Ipsorum retulit quidquid ad arma fuit.
5Danus [et] ostendit quidquid virtutis habebat,
Armis, consilio, viribus, ense, manu.
Pontificis villam sine muris tradidit igni;
Haec sibi laus, feritas pro probitate manet.
Danus ad arma potens, castellum milite, muris
10 Cinctum vi penetrat, diripit, urit, abit.
Haec duo qui novit, sibi comparet, inspicietque
Quis fuerit maior vel feritate minor.
Altas Francigenum cervices Danus abegit,
Arduus in sese deficit ille tumor.
15Francus Danorum minitatur castra vel urbes,
Nec capit haec, nec in his tela vel arma iacit.
Normannis sua iura manent feritate paterna,
Frustra bella ciet, qui probitate caret.
Anglus rex igitur, munitis urbibus armis,
20 Pertransire parat culmina salsa sali.
At Boreas perflans ventos involvit et arcet.
Dorsa maris stimulans turbida quaeque facit.
Denegat horrendo fremitu sua subdere iura,
Regales cuneos vi retinere cupit.
25Caesareas acies sic olim ferre recusat;
Caesar at indignans aequoris intrat iter.
Nauta refert varias borealis flaminis auras,
"Quem vehis est Caesar, quid times?" ille subit.
Par opus et dictum Willelmi regis habetur,
30 Qui Rufus quodam nomine dictus erat,
Labitur hinc rumor, quod consulis Andegavensis
In Normannigenas vis violenta furit.
Eynoris ad littus properat cum milite pauco,
Nauta canit Boream, respuit unda ratem.
35Rex contra: "Regem tantum non ferre pavescas,
Nam regem nullum subruit unda sali."
Sic violenta manus vi transiit aequoris alta,
Invitus Boreas regis ad arma favet.
Iure pari ferus iste salum fremitusque borinos
40 Temnens horrisonis flatibus instat, abit
Fluctibus in mediis, boreali flante procella,
Vela tument, naves concutit unda fremens.
Funibus abruptis mali funduntur, et ipsas
Antennas subito carbasa scissa ferunt.
45Nautarum strepitus sic militis ipse tumultus
Frangere vult fluctus, consolidare rates.
Saevior insistit Boreas, obsistit et Auster,
Huc illucque fretum turbine quisque rapit.
Iam maris unda furens tabulata per intima serpit,
50 Fluctus transtra tenet, planctus ubique sonat.
Nauclerus pavitans artem clavumque relinquit,
Fato se tribuit, flatibus, atque salo.
Vndas ceu montes videas vallesque profundas,
Hinc scopuli, Syrtes, inde Charybdis adest.
55In proram puppimque simul vis turbinis instat;
Proh dolor! hic geminas obruit unda rates.
Hic clari proceres pereunt cum milite multo,
Gaza sub undivagis fluctibus ipsa latet.
Fortior ast aliis regalis navis in alto
60 Praedita nautarum viribus obstat adhuc.
Nunc fluctus findit, nunc saevas transvolat undas,
Vis tabulata ratis frangere nulla potest.
Tempestas furibunda minax insurgit et arcet,
Ventus et imber obest, aequoris unda furit.
65Iam sibi praesidio mundano deficiente,
Non possunt miseri vivere sive mori.