Interea ante fores templi residente Beato
Mentis in excessu, et solium penetrante supernum;
Janitor aethereae mox Petrus Apostolus aulae
Veste alacris, vultu dulcis, sermone suavis,
Apparens, blandis solatur vocibus illum;
Hortaturque suum verbis pietatis amicum,
Ut repedaret iter, quo venerat inde revertens,
Gallorum et populis aeternae semina vitae
Divinis sereret verbis, coleretque, rigaret,
Conversosque sacri baptismatis amne lavaret.
Quatenus ad Dominum tanti mercede laboris
121.0938D| Frugifer accedens, messis portando maniplos
Sumeret uberius coelestis praemia regni.