Erucam calidam dicunt mediocriter esse,
siccam non adeo. Cibus ejus digerit escas
et valet urinas haec mansa vel hausta movere.
Manditur utiliter pueris, tussimque repellit,
emundare cutem maculis cum melle iugatam 1020
tradunt et mundos lentigine reddere vultus.
Elixata prius radix valideque subacta
ossibus et fractis superaddita detrahit illa.
Cum vino tritum si semen sumitur ejus
quosvis pestiferos ictus curare refertur. 1025
Haec nigras maculas purgat cum felle bovino
illita. Mira loquar, cum vino largius haustam
indurare ferunt hanc contra verbera sensum.
Si condituris coquus hanc admisceat herbam
aut semen, gratum dicunt praestare saporem,1030
euzomonque solent hac causa dicere Graeci
erucam, succus quod gustu sit bonus ejus.
Non modice mansam venerem stimulare vel haustam
confirmant pariter medici pluresque poetae.
Est cum lactucis haec herba comesta salubris,1035
namque calor dat temperiem cum frigore mixtus.