Dicunt ferventes quod habent nasturtia vires
et siccas; hac re venerem ceu ruta coercent,
siccando semen, fuerint si sumpta frequenter. 990
Fermento commixta recens haec herba terendo
anthracas curat (bona quae plebs ulcera dicit)
si superaddatur; curaque furunculus ista
emittit saniem cum qua dolor ille recedit.
Illius succus crines retinere fluentes 995
illitus asseritur, dentisque levare dolorem
de qua parte dolens dens est infusus in aurem.
Fortius est herba semen: depellit abortum
haustum cum vino, ventrisque animalia pellit
et sic serpentis dicunt obstare venenis;1000
solus odor positi carbonibus effugat illas.
Splen reprimit, mixto si saepe bibatur aceto,
herbam vel semen cum polline junge et aceto,
haec contrita simul sciasis superadde dolori,
utile non modicum confirmant hoc medicamen. 1005
Lichenas succus purgat cum melle perunctus;
si prurigo caput aut ulcera turpia foedant,
anseris admiscens adipi nasturtia trita
saepius unge caput, vitium pelletur utrumque.
Si coquis hanc herbam caprae cum lacte recenti 1010
illius aut semen, dolor angat pectora quisquis,
assumpto tepido potu sedabitur isto.
Semen cum tepida contritum pondere dragmae
et bibitum, dicunt quod duram molliat alvum;
tussim compescit semen cum melle voratum.1015