Est asarum graece dictum, vulgago latine.
Haec calidae et siccae virtutis dicitur esse,
tertius est illi gradus, ut dicunt, in utroque.
Provocat urinam, potataque menstrua purgat,1535
hocque modo jecoris medicatur sumpta dolori,
hydropicosque juvat, sciasim fugat hausta frequenter,
et vulvae morbis decoctio subvenit ejus.
Dicitur ictericum potata repellere morbum,
elleborique modo vomitu praecordia purgat,1540
sed non est hujus purgatio tam violenta,
nec metuenda quidem, si fiat taliter illa:
aetatem et vires ejus circumspice primum,
quem purgare voles, et tempus quale sit anni,
et si sit regio fervens vel frigida valde,1545
aut si temperiem mediam tenet inter utrumque;
nam senibus puerisque parum donare licebit,
aetatis mediae plus his juvenesque requirunt,
pinguibus et validis plus dandum quam macilentis
debilibusque viris, magis in gelida regione 1550
dandum quam calida, duris quocunque labore
plus illis tribues, quos reddunt otia molles.
Haec circumspiciens et caetera talia tractans
non solum tutus dabis hanc, sed quaslibet herbas
quae purgant vomitu stomachum, ventremve resolvunt. 1555
Sed quia de cunctis dixi communiter herbis,
quo sit danda modo proprie vulgago docebo:
de foliis ejus triginta recentia tollens,
adde meri tantum quo possint cuncta recondi,
tota nocte mero facias macerentur in illo,1560
mane terens vino, quo sunt macerata, resolve;
tunc olus excoctum cum pingui carne recenti
porcina prius aegroto da sufficienter,
et sumat vini quantum vult fortis et albi,
sic asari succum colatum trade bibendum. 1565
Fortibus et magnis est hic numerus foliorum
sufficiens, reliquis (ut diximus) est minuendus,
juxta quod vires, aetas et tempora poscunt.