Est ysopum siccum calidum quoque, tertius illi
est in utroque gradus. Ejus decoctio facta
sic ut cocta simul sint mel, ficus quoque sicca,1505
prodest non modicum patientibus hausta catarrhum,
subvenit et voci raucae versata palato,
et prodest cunctis pulmonum sumpta querelis;
lumbricos ventris eadem potata repellit.
In pectus capitis si destillatio fiat,1510
quod persaepe solet tussim phthisimque creare,
prodest haec eadem decoctio sumpta frequenter;
omnibus his prodest pulvis cum melle jugatus.
Contrito viridi si jungitur oxymel illi,
sicque datur bibitum, stipatum molliet alvum,1515
cum vento nocuo viscosum flegma repellens;
cardama si jungas his, solves fortius alvum.
Potio si viridis vel sicci saepe bibatur,
vultibus eximium fertur praestare colorem;
cum nitro et ficu sicca si conteris ipsum,1520
et superapponis spleni cataplasma tumenti
hydropicisve, solet siccando repellere morbum;
cum vino bibitum praecordia tensa relaxat,
et quicunque nocet tumor interiora recedet.
In quo decoquitur si dens foveatur aceto,1525
fertur ab immodico cito saepe dolore levari.
Accensi fumo sonitus compescitur auris.
Elixum appositum livores limpidat omnes,
sic juvat ictericos injectum naribus idem.
Auriculae dicunt gravem curare dolorem,1530
hoc mixtum roseo si fundis intus olivo.