Marrubium nostri, dixerunt prassion Argi;
hanc herbam medici calidam siccamque secundo
tradunt esse gradu; decoctio totius herbae
seminis aut ejus phthisicos mire juvat hausta,1440
pectoris haec varios compescit potio morbos,
et melius prodest, illi si jungitur iris;
asthmaticos sic sumpta juvat tussimque repellit.
Accelerat partus eadem pellitque secundas;
si mel marrubio jungatur, vulnera purgat,1445
hocque modo curat, quae rodunt ulcera carnem;
dicitur hoc bibitum lateris sedare dolorem.
Omnibus his succus siccatus proderit ejus;
Illius succus cum vino melleve mixtus
prodest luminibus caligine debilitatis;1450
sic juvat ictericos injectus naribus idem,
auriculaeque gravem dicunt curare dolorem,
hunc mixtum roseo si fundas intus olivo.
Usum marrubii dicunt non esse salubrem
his, qui vesicae morbo renumque laborant.1455