Andrachne graece quae portulaca latine
dicitur, haec vulgi pes pulli more vocatur.
Humida vis ejus et frigida dicitur esse,750
tertius humoris, frigoris vero secundus
huic gradus est. Febrem, quam causon Graecia dicit,
inde juvat, stomacho viridis superaddita trita,
praestat idem succus, si sumitur; herbaque mansa
aut ut olus accepta, solet lenire calorem. 755
Mansa vel hausta potest nimium restringere fluxum
sanguinis et ventris nimium cohibere fluorem.
Esse vetat dentes illis contrita stupentes,
et tumidis oculis prodest superaddita trita,
fervorem solis aestate comesta nocere 760
non sinit et ventrem cum vino et cum sale mollit,
vesicaeque solet sedare comesta dolores.
Acidulae similes huic pene per omnia vires
effectusque pares testatur Plinius esse.