Elleborum nigrum non est adeo violentum,
nec formidandum quantum quod diximus album;
hoc quoque praecipiunt veteres in lente coquendum,1835
aut in juscellis; sic insanis medicari
assumptum dicunt et sic prodesse podagrae.
Hydropicis mota febre dicitur auxiliari,
miram sentit opem sumpto paralyticus illo,
et varios bibitum morbos levat articulorum,1840
educit choleras varias et flegma per alvum,
elixaturae potu caligo fugatur;
duricias suppuratas factum cataplasma
concoquit et purgat; vacuat syringia callo
infixus modicus radicis surculus ejus,1845
postque dies geminos sit surculus ille remotus.
Hordea, quam dederint, contrito junge farinam,
hydropicus tumor appositis siccabitur istis;
menstrua suppositum purgat, depellit abortum,
auditum reddit, si surdis auribus illud 1850
imponas et post biduum triduumve repellas.
Appositum tollit maculas ejus cataplasma,
emundat lepras, scabies quascunque repellit.
Ore diu tentum, quo coxeris illud, acetum
dentis non modicum dicunt sedare dolorem. 1855
Ellebori nigri praecepit Plinius unam
donari dragmam, leviter sic promovet alvum,
plusquam bis binos obolos vetat accipiendum.