Sunt centaureae species, maiorque minorque,
ut suprascriptis dixi de pluribus herbis,1710
sed quia perpaucis species est cognita major,
hanc praetermittens vires narrabo minoris,
quam notam cunctis credo vulgaribus ipsis.
Desiccativae virtutis dicitur esse,
non modicum plagas conglutinat inde recentes,1715
inque cicatricem veteres superaddita ducit;
illi, qui sciasim patitur, decoctio mire
prodest, illius si sit subiecta per anum,
sanguine detracto sedat mox illa dolorem,
fomento nervis eadem medicabitur aegris. 1720
Illius succus deducit menstrua sumptus,
pellit abortivum; medicamina cuncta maligna
cum vino sumptum dicunt purgare per alvum;
melle sibi juncto caligine lumina purgat.
Illius exprimitur autumni tempore succus,1725
quem desiccatum ferventi sole reponunt,
ad rerum curam, quas diximus ante, salubrem.